Cefnogwyr Enwog

Mae llyfrgelloedd yn golygu gwahanol bethau i wahanol i bobl, a dyma sylw neu ddau gan rai o’n cefnogwyr enwog:

Keith Richard – Y Rolling Stones

Mae Keith Richards ar hyn o bryd ar daith y band rownd y byd, sef ‘50 and Counting’. Yn ôl seren caneuon fel Paint It, Black, roedd yn arfer teimlo’n gartrefol yn y llonyddwch a’r hedd sydd i’w gael mewn llyfrgell, er gwaethaf yr hanesion ymfflamychol amdano. Esboniodd Keith: “I mi, roedd yn rhywle lle caech chi syniad fod yna’r fath beth â gwareiddiad. Dyna’r unig fan lle byddwn i’n fodlon cadw at y rheolau heb gael fy ngorfodi, pethau fel tawelwch. Yno, roeddwn i’n gallu dargafnod mwy am bethau yr oedd gen i ddiddordeb ymddyn nhw.”

Trwy garedigrwydd papur newydd The Mirror:

http://www.mirror.co.uk/3am/celebrity-news/keith-richards-faces-library-fine-1903324

Chris Corcoran

Os ydych yn wynebu amser anodd gartref neu yn yr ysgol, angen mynd ar y we neu gael gwybodaeth ar gyfer prosiect, neu os ydych eisiau cael gafael ar nofelau neu e-lyfrau, mae’r llyfrgell yn lle grêt i ddod o hyd i hyn i gyd, a’r peth gorau oll yw fod y cyfan am ddim! Felly rwy’n eich annog chi a’ch teulu i edrych o’r newydd ar eich llyfrgell yr hydref yma a gweld beth sydd ganddyn nhw i’w gynnig.

Jade Jones

Dywedodd Jade Jones, a enillodd Fedal Aur yn y Gemau Olympaidd, ‘Mae’n hyfryd bod yn rhan o ymgyrch I’r Llyfrgell, I Ddarllen, I Wella. Mae llyfrau’n ffynhonnell wych o ysbrydoliaeth a chymhelliant ac mae eistedd lawr gyda llyfr da yn sicr o wneud ichi ymlacio bob amser. Mae Iechyd a Lles yn bwysig iawn i mi fel athletwraig ac mae’n rhyfeddol gymaint o gyngor a gwybodaeth y gallwch eu cael o’ch llyfrgell leol, a’r cwbl am ddim. Byddwn yn cynghori pawb, dim ots beth yw eu hoedran, i edrych o’r newydd ar eich llyfrgell ac efallai y gwnewch chi synnu at yr hyn sydd i’w gael yno!’

Stephen Fry

Fry’s Planet Word, BBC HD

Pan fyddaf yn mynd i mewn [i’r llyfrgell] rwy’n teimlo rhyw wefr. Mae bron â bod yn rhywiol. Mae yna rywbeth am y ffaith, y tu ôl i’r holl gloriau rhwymedig fod yna leisiau, mae yna bobl yn murmur, yn eich denu, eich llusgo i’w byd nhw. Maen nhw’n lleoedd rhyfeddol. Mae’n siwr gen i, os oes ymgyrch rwy’n ei chefnogi i’r carn, achub ein llyfrgelloedd yw’r ymgyrch honno.

Fry’s Planet Word, BBC HD, 16 Hydref

Nathan Stephens

Paralympiad

Rwyf wrth fy modd yn cefnogi’r Pythefnos Llyfrgelloedd a byddwn yn annog unrhyw un, yn enwedig y rhai sydd heb ymweld â llyfrgell yn ddiweddar, i weld beth sydd ar gael ar eu stepen drws.

Fe synnes i fod cymaint yn digwydd yn y llyfrgell. Rydyn ni’n ffodus iawn o gael gwasanaethau llyfrgell mor helaeth ar hyd a lled Cymru, felly rydw innau wedi ymuno nawr ac mae Jamie wedi gosod her i mi: sef darllen ei lyfr!

Jamie Baulch

Cyn Athletwr Olympaidd

Fe wnes i fwynhau’n fawr cael bod yn rhan o’r Pythefnos Llyfrgelloedd a chwrdd â staff llyfrgelloedd a defnyddwyr. Rwyf wrth fy modd yn mynd â’m plant i’n llyfrgell leol a dewis llyfrau a DVDs gyda nhw.

Mae’n grêt gweld llyfrgelloedd yn mynd ati i ddathlu Llundain 2012 a chael eu hysbrydoli i drefnu cymaint o wahanol ddigwyddiadau ar gyfer pob oed a diddordeb.

Ruth Jones

Actores ac Awdur, Hyrwyddwr Llyfrgelloedd Cymru 2009/10

Rwy’n ffan mawr iawn o lyfrgelloedd. Does dim digon o bobl yn ymwybodol o botensial llyfrgelloedd a’r hyn y gallant ei wneud iddyn nhw – mae llyfrgelloedd yn eich ysbrydoli ac yn aml maen nhw yng nghanol y gymuned – noddfa sydd ar agor i bawb, o fabanod a phlant bach i bobl hŷn, ac rydych yn gallu ymuno am ddim.
Rydw i wedi treulio oriau mewn llyfrgelloedd cyhoeddus ac academaidd drwy gydol fy oes – yn darllen, ysgrifennu ac ymchwilio. Yn y llyfrgell y gwnes i ddarganfod y rhyngrwyd gyntaf erioed a byddwn yn annog unrhyw un sydd heb fod i’w llyfrgell yn ddiweddar (neu erioed!) i fynd draw i gael golwg.
Siaradwch â’r staff i weld beth sydd ar gael – yn ogystal â channoedd o lyfrau gwych ar bob pwnc dan haul a hynny am ddim, mae yna DVDs a chrynoddisgiau ar gael, mynediad am ddim i’r rhyngrwyd, dosbarthiadau a gweithgareddau.

Cerys Matthews

Cerddor

Mae llyfrgelloedd yn lleoedd gwych, mae fy mhlant wrth eu bodd yn mynd draw i’n llyfrgell leol ni ac mae gen i atgofion melys o brynhawniau glawog mewn llyfrgelloedd ledled Cymru ac mae cymaint i’w gael am ddim!

Gethin Jones

Cyflwynydd teledu a chyn gyflwynydd Blue Peter

Mae llyfrgelloedd wedi chwarae rhan bwysig yn fy mywyd – o’r cyfnod pan oeddwn yn blentyn yn dewis fy hoff lyfrau, hyd at astudio ar gyfer fy ngradd yn y Brifysgol. Rwy’n edmygu’r ffaith fod llyfrgelloedd yn cynnig cymaint erbyn hyn – nid y llyfrau yn unig, ond DVDs, llyfrau llafar a mynediad am ddim i’r rhyngrwyd ac mae’n grêt bod cymaint ar gael am ddim!

Colin Jackson

Athletwr Olympaidd a Chyflwynydd Chwaraeon

Fe fu llyfrgelloedd yn ysbrydoliaeth i mi yn gyson. Rwyf wedi’u defnyddio am amryw o resymau – ymchwilio i hanes fy nheulu, cael benthyg llyfrau ar gyfer gwaith a hamdden, holi’r staff a dysgu pethau newydd. Ble arall mae llyfrau i’w cael am ddim – mae’n rhaid bod hynny’n rhoi gwên ar eich wyneb!

Cat Whiteaway

Ymchwilydd i Hanes Teulu, Cyflwynydd Radio a Theledu

Fyddwn i ddim yn gallu paratoi fy rhaglenni radio a theledu ar hanes teulu heb gymorth llyfrgelloedd. Mae gwybodaeth leol y staff yn allweddol ac yn aml iawn byddwn yn dod ar draws pobl sydd ag arbenigedd a brwdfrydedd at faes arbennig yn y llyfrgell. Byddai fy ngwaith i’n ofnadwy o ddiflas petai’r atebion i gyd i’w cael mewn un lle ac mae llyfrgelloedd yn un o’r lleoedd gorau i ddechrau ymchwilio.

Sian Lloyd

Darllenydd Newyddion BBC Cymru

Roedd ymweld â’m llyfrgell leol yn Wrecsam ar fore Sadwrn yn bleser pan oeddwn yn tyfu i fyny. Roeddwn i’n arfer mwynhau eistedd ar y clustogau cyfforddus yn yr adran blant a dewis fy llyfrau ar gyfer yr wythnos. Pan oeddwn yn fyfyrwraig roedd yr adran gyfeiriadol yn ddefnyddiol dros ben ar gyfer fy astudiaethau, a gan fy fod yn fam fy hun erbyn hyn rwy’n mynd â’m mab bach i’r llyfrgell yng Nghaerdydd.

Roy Noble

Cyflwynydd Radio Wales a BBC Cymru

Mae pob math o gyfrinachau mewn llyfrgelloedd – gallwch edrych yn ôl, deall mwy am nawr ac edrych o’n blaenau. Dylem fod yn barod i rannu’r cyfrinachau a’u gwarchod hefyd. Mae llyfrgelloedd yn focs o bosibiliadau, a dylai pawb gael allwedd.

Derek Brockway

Dyn Tywydd a chyflwynydd teledu BBC Cymru

Rwyf wedi ymweld â llawer o lyfrgelloedd wrth deithio o amgylch Cymru – does yna ddim llawer o leoedd ble gallwch alw i mewn, eistedd i lawr a darllen llyfr neu fynd ar lein am ddim, heb deimlo bod yn rhaid i chi brynu rhywbeth! Rwy’n siŵr y byddech yn synnu cymaint o bethau sy’n digwydd mewn llyfrgelloedd, gyda phob math o weithgareddau, o rai ar gyfer plant bach hyd at bobl hŷn, a dosbarthiadau mewn popeth o wau i ioga!

Sara Edwards

Cyflwynydd teledu a chyn ddarllenydd newyddion BBC Cymru

Mae fy merch Hannah a minnau’n treulio llawer o oriau difyr yn y llyfrgell! Rydym yn aelodau yng Nghaerdydd a hefyd yn fy llyfrgell fach leol yng ngorllewin Cymru – maen nhw mor wahanol! Rydym wrth ein bodd yn treulio amser yn adran y plant yn edrych ar lyfrau newydd, dod o hyd i leoedd newydd i eistedd a chael sgwrs â’r staff. Mae llyfrgelloedd yn lleoedd mor groesawgar a diogel i bawb eu mwynhau.