Mae Diwrnod Cenedlaethol Darlunio yn ddathliad blynyddol o’r lluniau sy’n hanfodol i’n bywydau a’r bobl wych sy’n eu gwneud.
Pam dathlu Diwrnod Cenedlaethol Darlunio?
Mae darluniau ym mhobman – mewn llyfrau lluniau a nofelau graffig, ar bosteri ac arwyddion, ac wedi’i ymgorffori mewn gemau fideo ac apiau. Mae’n rhan enfawr o’n bywydau ac yn elfen hanfodol o lyfrau o bob math. P’un a ydych chi’n ddarlunydd, ysgol, llyfrgell neu siop lyfrau, mae yna lawer o ffyrdd y gallwch chi ddathlu darlunio ar 28 Tachwedd.
Fel yr elusen genedlaethol ar gyfer darlunio, mae Canolfan Darlunio Quentin Blake yn gwahodd pawb i ddathlu’r lluniau sy’n rhan o’n bywydau – ac ar ein silffoedd – a’r bobl wych sy’n eu gwneud.
Darganfyddwch fwy yn y ffilm 101 eiliad Beth yw darlunio?
Cynorthwydd Llyfrgell Clare gyda’r Arddangosfa Llyfrau Darlunio yn Llyfrgell Llanrwst
Beth sydd ymlaen?
Mae llyfrgelloedd ledled Cymru yn cymryd rhan mewn sawl ffordd, felly beth am alw draw i’ch llyfrgell leol ar neu o gwmpas y 28ain o Dachwedd.
Efallai y byddwch yn dod o hyd i arddangosfeydd o lyfrau lluniau amrywiol, nofelau graffig neu ffeithiol, digwyddiadau fel sesiwn amser stori arbennig i deuluoedd, digwyddiad nofel graffig i bobl ifanc yn eu harddegau, neu ddarlunydd lleol yn cyflwyno sgwrs.
Bydd Llyfrgelloedd Conwy yn trefnu arddangosfeydd arbennig ym mhob un o’u pum llyfrgell ardal i ddathlu Diwrnod Cenedlaethol Darlunio 2025.
Meddai Megan Elias Jones, Swyddog Marchnata Diwylliant a Llyfrgelloedd Conwy: “Yn llyfrgelloedd Conwy rydym yn ffodus i weld llyfrau darlun hardd bob dydd, ac roeddem am rannu ein llyfrau plant amrywiol sy’n cynnwys lluniau yn adlewyrchu ein bywydau bob dydd, ein silffoedd llyfrau a’r artistiaid gwych sy’n eu creu.
Y Diwrnod Cenedlaethol Darlunio yma rydym wedi creu arddangosfeydd yn ein llyfrgelloedd i annog ein cymuned i ddod o hyd i’w hoff lyfrau darlun a darganfod darluniau newydd!“
Arddangosfa Llyfrau Darlunio yn Llyfrgelloedd Conwy
Ymunwch â’r ymgyrch cyfryngau cymdeithasol
Ar 28 Tachwedd, ymunwch ag ymgyrch cyfryngau cymdeithasol y Diwrnod Cenedlaethol Darlunio Cenedlaethol. Postiwch hoff ddarlun neu lun o’r hyn rydych chi wedi bod yn ei wneud, gan dagio @qbcentre a #NationalIllustrationDay
Gwobrau Clawr y Flwyddyn am Lyfrau i Blant a Phobl Ifanc
Ar 26 Medi y flwyddyn yma, cyhoeddodd Cyngor Llyfrau Cymru deitlau’r llyfrau sydd wedi ennill Gwobrau Clawr y Flwyddyn am Lyfrau i Blant a Phobl Ifanc 2025.
Enillydd y categori Gymraeg oedd Nos Da Blob (Y Lolfa). Darluniad y clawr: Huw Aaron. Dyluniad y clawr: Opal Roengchai. Awdur: Huw Aaron. Enillydd y categori Saesneg oedd Fishfolk (Firefly Press). Darluniad y clawr: Hannah Doyle. Awdur: Steven Quincey-Jones.
Sefydlwyd y gwobrau er mwyn dathlu cyfraniad darlunwyr a dylunwyr, a’u gwaith i ddod â straeon yn fyw a chreu llyfrau trawiadol a deniadol sy’n apelio at ddarllenwyr ifanc. Cefnogir y Gwobrau gan Adran Addysg Llywodraeth Cymru o dan Raglen Cymorth Grant y Cwricwlwm.
Dywedodd Helgard Krause, Prif Weithredwr Cyngor Lyfrau Cymru: “Llongyfarchiadau mawr i ennillwyr y gwobrau eleni. Mae’n braf cael tynnu sylw at waith caled dylunwyr a darlunwyr fel hyn, ac i ddathlu’r doniau anhygoel sydd gennym yn gweithio yn y sector yng Nghymru. Llawer o ddiolch hefyd i aelodau ein Panel Pobl Ifanc, a gafodd y dasg anodd o feirnidu’r gwobrau eleni o blith cymaint o ymgeiswyr haeddiannol.”
Mwy am y Gwobrau ar newyddion Cyngor Llyfrau Cymru.
Am fwy o wybodaeth ar sut i gymryd rhan yn Niwrnod Cenedlaethol Darlunio, ewch i wefan Canolfan Darlunio Quentin Blake.